Google kutenganisha biashara ya matangazo, ili kutengeneza kampuni mpya ambayo itakuwa chini ya kampuni mama ya ALPHABET. ALPHABET ni shirika linalomiliki kampuni zingine chini yake, hii ikiwa ni Google, Google Fiber, Waymo, DeepMind na mengine kadhaa.
Shirika la ALPHABET lilitengenezwa mwaka 2015 na viongozi wa Google baada ya kuona kuna huduma nyingi ndani ya Google zilizostahili kusimama kama kampuni zikijiendesha zenyewe.
![mfumo wa matangazo wa google](https://teknolojia.co.tz/wp-content/uploads/2022/07/google-ads.png)
Je kwa nini Google wanataka biashara ya matangazo (Google Ads) kujitegemea na kuwa kampuni nyingine huru ndani ya familia ya ALPHABET?
Google inapitia changamoto mbalimbali za kisheria na uchunguzi nchini Marekani na barani ulaya kuhusu biashara yake ya matangazo.
Wanaonekana kibiashara, wameshika kila hatua utangazaji: Ukitaka kutangaza utaenda kwa Google kununua nafasi za matangazo, mfumo wa Google ndio utakaochanganua na kukuuzia matangazo, na bado Google hao hao wanamiliki maeneo ya kuonesha matangazo (YouTube, Google Search na kupitia maeneo ya picha/maneno yanayotokea kwenye tovuti mbalimbali).
Vyombo vya usimamizi wa biashara na kisheria vya Ulaya na Marekani vimekuwa kwa muda mrefu vikiona Google inamiliki asilimia kubwa ya soko la utangazaji mtandaoni.. Kiasi cha kuweza kufanya gharama iwe kubwa kuliko uhalisia (Monopoly). Uamuzi wa Google wa kutaka kwa sasa huduma ya ununuaji matangazo iwe kampuni binafsi itaweza kuondoa malalamiko haya.
Uwezekano mkubwa;
- Kampuni mpya itasimamia ununuaji wa matangazo. Google watabaki na uuzaji wa maeneo ya matangazo.
- Vyombo vya biashara/sheria za ushindani vinaweza bado visiridhishwe na mabadiliko haya, kwani makampuni yote yatakuwa bado chini ya kampuni mama ya ALPHABET.
- Google anaweza chukua hatua zaidi kwa kuwezesha njia nyingi zaidi za kununua matangazo ya kufikia watumiaji wa huduma zake – kufungua milango kwa makampuni mengine kuuza matangazo ya kuonekana kwenye huduma za Google kama YouTube.
Tutaendelea kufuatilia mchakato huu wa mabadiliko ndani ya Google yanayohusisha biashara yake ya matangazo.
Kama unatumia huduma za Google kibiashara (ununuaji wa matangazo au blog/tovuti inayotumia huduma ya uuzaji matangazo – Ad display) basi ni muhimu uwe tayari kwa mabadiliko yanayotegemewa kutokea ndani ya miezi hii michache.
Chanzo: TheVerge na vyanzo mbalimbali
No Comment! Be the first one.