Mara kadhaa tumekuwa tukiandika kuhusu ujio wa video za makundi kwenye Instagram na watu wengi kuonekana kufurahia kitu hicho kipya sasa kipengele hicho ni rasmi kimeshawekwa.
Video za makundi/kuweza kumshirikisha mtu mwingine kwenye mazungumzo kwa njia ya picha jongefu ni kitu ambacho watu wengi walikuwa wakikiongelea na hivyo kuwafanya wale wataalamu wa kuandika programu kulifanyia kazi suala hilo.
Sasa ni rasmi nikiwa na maana ya kwamba mtu anaweza kuanzisha mazunguzo ya video ya zaidi ya mtu mmoja kwenye Instagram kwa kubonyeza kitufe cha kamera.
Ni takribani watu watano (5) pamoja na wewe mwenyewe ndio wanaweza kufanya mazungumzo kwa njia ya picha jongefu kwa wakati mmoja kwenye Instagram.
Mbali na ujio huo pia, bado wahusika wameendelea kuongeza vikatuni ambavyo vimekuwa maarufu sana kwa kuongeza nakshi nakshi kwenye picha/picha jongefu.
Unafikiri ukiwa unaongea kwa njia ya picha jongefu huwezi kuperuzi?
La hasha! Bado utakuwa na uwezo wa kufanya mengine kama ilivyo kwenye kompyuta, unaweza ukaufanya ule uwanja wa mazungumzo yenu kuwa mdogo huku wewe ukiendekea kuangalia mengineyo kwenye Instagram.
Kipengele hicho hakipo kwenye hatua ya majaribio kwahiyo kinapatikana kwenye Android na iOS, kitu cha msingi tu ni kufanya masasisho programu tumishi ya Instagram.
Vyanzo: Engadget, TechCrunch