App maarufu ya Telegram imeendelea kupata misukosuko baada ya serikali ya Iran kuipiga marufuku nchini humo na badala yake kuzindua programu tumishi mpya yenye maudhui kama ya Telegram.
Kulingana na ripoti ya Al Jazeera serikali ya Iran inawahimiza wananchi wake kutumia programu tumishi mpya waliyoizindua siku ya Alhamisi iliyopita inayoitwa Soroush ambayo inaelezwa kwamba haina faragha yoyote kwa watumiaji wake.
Telegram inakadiriwa kuwa na watumiaji milioni 40 nchini Iran na iliripotiwa kutumiwa na waandamanaji mwaka 2017 kama sehemu ya kuhimizana na kuhabarishana juu ya maandamano.
Programu tumishi ya Soroush inayofanana kabisa na ile ya Telegram.
Programu tumishi ya Soroush iliyozinduliwa Alhamisi iliyopita inaonekana kuwa na sifa za kawaida ambapo watu wanaweza kutuma/kupokea ujumbe na kupakua video lakini upo wasiwasi mkubwa kwamba serikali inaweza kuwa inafuatailia yote yanayozungumzwa na kujadiliwa na wananchi.
Baadhi ya vikatuni (emoji) vilivyopo kwenye programu tumishi ya Soroush.
Telegram pia katika siku za karibuni imepigwa marufuku nchini Urusi na serikali ya nchi hiyo imekuwa ikifanya jitihada za kuiondoa katika Google Play store hatua ambayo ilisababisha maandamano makubwa katika jiji la Moscow mwanzoni mwa wiki hii.
Timu ya uandishi wa Kona ya Teknolojia ingefurahi kupata sapoti yako ili iendelee kukuletea habari na maujanja mbalimbali.
Wezesha bando kwa kutuma kiasi chochote kupitia Selcom, kwenye simu yako bofya *150*50*1# kwenye namba ya malipo weka 60751369 jina litakuja TEKNOKONA.
