Kampuni ya Transsion Holdings imezindua simu mpya ya Infinix Hot 6 pro na Infinix Hot 6 kwa mara ya kwanza katika ukanda wa Afrika Mashariki nchini Kenya.
Simu hii mpya inaonekana kufanana sana na Infinix Hot S3 ambayo ilizinduliwa mapema mwaka huu nchini Nigeria. Simu hii mpya ya Infinix Hot 6 pro itauzwa kwa bei nafuu atakayomudu mtu wa kawaida lakini ikiwa na uwezo mkubwa katika ufanyaji kazi wake.
Undani wa Infinix Hot 6 Pro.
Kama zilivyo simu nyingine zilizotoka miaka ya karibuni, zimekuwa zikitoa matoleo mawili sawia lakini yakatofautishwa kwenye ukubwa wa kioo, uhifadhi pamoja na RAM, kadhalika kwa Infinix imekuwa hivyo pia.
Matoleo haya tofauti ya Infinix Hot 6 Pro na Infinix Hot 6 ni kwenye ukubwa wa kioo na ujazo wa ndani tu. Leo kupitia TeknoKona utapata kujua undani wa Infinix Hot 6 Pro.
Betri
Kwa upande wa betri Hot 6 Pro ipo vizuri sana. Ina betri yenye ujazo wa 4000mAh. Hii itasaidia kuweza kutumia simu yako kwa siku nzima bila wa kuwa na wasiwasi kuishiwa chaji. Ujzao wa Betri utakufanya utumie simu bila ya kujibanabana.
Betri yake isiyotoka na ina mfumo wa ujazaji chaji wa haraka (Quick charge) ambao ndani ya masaa mawili inajaza betri lililokuwa halina chaji kabisa.
Prosesa
Jambo zuri kwenye simu hii ya Hot 6 pro ni prosesa. Kwa muda mrefu simu za Infinix zimekuwa zikitumia prosesa za MediaTek kitu ambacho hakikuwa kinawafurahisha watumiaji wake wengi hivyo walihitaji mabadiliko kwenye upande wa prosesa.
Ndio, mwisho kampuni imeamua kubadili prosesa na kutumia prosesa ya Snapdragon 425. prosesa hii kuna watu wanaweza kusema ni za nyuma hilo sio muhimu sana kwani Prosesa za 425 rasmi zilianza kutumika robo ya tatu ya mwaka 2016.
Snapdragon ni moja ya prosesa bora zaidi na zinazotumiwa kwenye simu nzuri na ghali duniani. Kasi ya prosesa katika Hot 6 Pro ni 1.4GHz.
Kamera
Kwa upande wa kamera zipo mbili za nyuma, moja yenye 13Mp na nyingine yenye 2MP. Hii ni tofauti na Hot 5 iliyotoka mwaka uliopita ambayo ilikuwa na kamera moja ya nyuma. Na kamera ya mbele (Selfie) ina 5MP.
RAM & Programu Endeshi
Upande wa RAM ina 3GB ambazo ni kiwango kizuri kulingana na mfumo endeshi wa simu hiyo ambao ni Android 8.1 Oreo.
Sifa nyinginezo za Infinix Hot Pro 6
Aina ya kioo: HD+ IPS LCD kikiwa na ukubwa wa inchi 6 (18:9)
Uhifadhi wa ndani: 32GB na uhifadhi wa ziada mpaka 128GB
Teknolojia ya mawasiliano: 2G, 3G, 4G ikitumia laini mbili
Ukubwa Betri: 4000mAh aina ya Li-Ion
Rangi ya simu: Nyeusi, Dhahabu, Nyekundu na Bluu