Microsoft wapo njiani kuja na mabadiliko ya apps za huduma zake kwenye simu za iPhone. Wanatengeneza app moja itakayotoa huduma za Excel, Word na Powerpoint, tofauti na sasa ambapo ni apps tofauti.
Jambo kama hili tayari limefanyika kwa ushirikiano na Samsung, ambapo toleo la app ya Microsoft Office Mobile linapatikana katika soko la apps la Samsung – Galaxy App Store. Ni app moja isiyo nzito inayoweza kufungua mafaili ya Word, Excel na PowerPoint.
Katika toleo la app hii kwa ajili ya iPhone timu ya Microsoft ya nchini India ndio inalifanyia kazi jambo hili na toleo la app linategemewa kufikia mwaka 2020.
Kwa watumiaji wa Android wanaotumia simu za Samsung tayari wanaweza kupakua app hiyo kupitia soko la apps la Samsung kwenye app ya Galaxy App Store. Kwa watumiaji wengine wa Android inategemewa toleo linaweza likaanza kupatikana kwenye Google PlayStore hapo baadae.
Ushirikiane wake na Samsung katika utengenezaji wa app hii unaweza kuwa na maana itachukua muda hadi app hiyo kuanza kupatikana kwa watumiaji wa simu zingine.