Mi Air Charge: Kampuni ya Xiaomi kuleta teknolojia ya kuchaji pasipo mguso wowote

Kampuni ya Xiaomi kupitia ukurasa wake wa mtandao wa Twitter imetangaza ujio wa teknolojia mpya ya kuchaji simu na vifaa vingine bila mguso wowote – Mi Air Charge.

Teknolojia hii wanayoiita Mi Air Charge Technology imelenga mahitaji ya chaji katikati ya shughuli kama kucheza game, na hata pale ambapo umekaa tu na ungehitaji simu yako kupata chaji. Teknolojia hii ni mwendelezo na uvumbuzi mwingine katika teknolojia ya wireless charging ambapo hadi sasa, kiwango kilichofikiwa ni kwa kutumia mguso kati ya simu na kifaa cha kuchaji bila kuchomeka waya wowote katika simu.

Ikumbukwe si mara ya kwanza habari za ujio wa teknolojia hii kuibuka, mara ya kwanza ikiwa ni bidhaa kama Motherbox, Wi-Charge,na kutoka kampuni  ya Energous, pamoja na tetesi toka kamouni ya Apple.

Tetesi hizo hazikuonekana kuwa na hakika ya kutimia, lakini kampuni ya Xiaomi imeonesha nia ya kulitimiliza hili mapema kupitia kutangaza kwenye ukurasa wake wa Twitter. Taarifa zaidi juu ya teknolojia hii zitazidi kutolewa kadri inavyozidi kufahamika.

Unaonaje teknolojia hii? Je inaweza kuwa na faida zipi kwa jamii ya watumia simu na vifaa vingine vya umeme?

Vyanzo: Xiaomi