Je unafahamu jinsi ya kusafisha simu yako? Tukiwa katika janga la Coronavirus ni muhimu sana kuepuka kujishika uso, lakini je unafahamu jinsi ya kuhakikisha kitu kinachogusa kichwa chako mara kadhaa kwa siku ni kisafi?
Kitengo cha Serikali ya Marekani kinachoshugulikia masuala la milipuko ya magonjwa (Centers for Disease Control and Prevention) kinatambua simu kama moja ya kitu kinachoweza kusambaza virusi kwa urahisi.
Kumbuka;
- Simu huwa unaiweka sehemu mbalimbali kama meza n.k.
- Pia ukisalimiana au kushika vitu mbalimbali mwisho wa siku huwa unashika simu yako
- Pia katika kuongea na simu kwa kuileta kichwani basi tunawapa virusi nafasi kulifikia eneo la uso kwa urahisi
Muhimu kuepuka;
Kumbuka simu nyingi hazina uwezo wa kuepusha maeneo ya ndani kulowa na maji, hivyo epuka suala la uoshaji wa kutumia maji mengi.
Pia kuna vitu ambavyo havifai kabisa kutumika katika usafishaji wa simu kwani vinaweza kuharibu kioo/display ya simu. Epuka vimiminika vya kusafishia vyenye kemikali kali, mfano sabuni za kusafishia mikono (hand sanitisers), ‘bleach’, chochote chenye kemikali za ‘chroline’ au bidhaa za kusafishia vioo vya magari au madirisha.
Jambo la kufanya.
> Njia ya kwanza
Vitambaa laini vinavyouzwa kwenye maduka ya dawa (‘Wipes’) zenye uwezo wa kuua vijidudu vinafaa kutumika. Hivi huwa havina unyevunyevu mwingi na hivyo ni salama kutumika. Unaweza kutumia hivi na baada ya hapo ukatumia kitu kikavu kama vile ‘toilet paper’ au kitambaa kingine ambacho unauhakika kipo salama.
> Njia ya pili
Kutumia sabuni ya kawaida ya kuogea yenye sifa na uwezo wa kuua virusi na bakteria, kama vile Dettol na zingine za jamii kama hii.
Changanya sabuni na maji kidogo. Chukua kitambaa laini kama leso au vile vitambaa vya kusafishia miwani. Kilainishe kidogo na kisha safisha simu yako katika maeneo yote ya nje kwa utaratibu, usitumie nguvu za kusugua – si muhimu.
Muhimu kufahamu:
- Ni muhimu uzime simu yako kabla ya kuanza kuisafisha.
- Epuka kutumia maji/maji mengi. Ni simu chache hasa hasa za bei ya juu ndio zinauwezo wa kuhimili kuloweshwa na maji mengi/yanayotiririka.
- Hakikisha simu imekauka vizuri kabla ya kuiwasha tena.