Shirika la Majisafi na Majitaka Dar Es Salaam (DAWASCO) limejiunga na mfumo mpya wa kielektroniki wa malipo serikalini uitwao GePG (Government Electronic Payment Gateway system) kuanzia jana, Mei 2 2018.
Afisa Mtendaji Mkuu wa Dawasco, Mhandisi Cyprian Luhemeja, ameyasema hayo wakati akizungumzia shirika lake kujiunga na huduma ya malipo ya mfumo mpya wa serikalini wa GePG; wateja wa Dawasco wataweza kufanya malipo ya ankara zao kupitia akaunti za kwenye simu yaani M-Pesa, tiGo Pesa na Airtel Money.
Mfumo huo mpya umetajwa utalinufaisha shirika hilo kwa sababu utaondoa ulipaji wa tozo za kamisheni ya asilimia 4 kwa miamala ya shirika hilo ambayo awali ilikuwa ikilipwa kwa wakala wa Maxcom na Selcom.
Kwa utaratibu huo mteja atalipa kiasi kisichopungua asilimia 1 kwa kila muamala atakaoufanya tofauti na awali ambapo malipo hayo ya kamisheni yaligharamiwa na Dawasco.
Wafanyakazi wakipata maelekezo ya namna mfumo mpya wa kufanya malipo kwa mashirika mbalimbali ya serikslini (GePG)
Kufuatia hatua ya kuacha kuwatumia Maxcom na Selcom, Dawasco itaokoa shilingi 2.4 bilioni kwa mwaka kama sehemu ya makato kupitia wakala hao.
Malipo yatafanyika kwa kila mteja kupewa namba maalum (Control Number) ambayo itakuwa na tarakimu 12 na itatolewa bure kwa wateja wote wa Dawasco.
Mbali na Dawasco wengine ambao tayari wameshajiunga na mfumo huu wa malipo wa kielektroniki wa GePG, ni Shirika la umeme la Tanesco, malipo ya kodi ya viwanja (Wizara ya Ardhi), Wizara ya Fedha, Bandari na Wizara ya Maliasili.
Timu ya uandishi wa Kona ya Teknolojia ingefurahi kupata sapoti yako ili iendelee kukuletea habari na maujanja mbalimbali.
Wezesha bando kwa kutuma kiasi chochote kupitia Selcom, kwenye simu yako bofya *150*50*1# kwenye namba ya malipo weka 60751369 jina litakuja TEKNOKONA.
