Kampuni ya simu ya Vodacom kwa kushirikiana na Mamlaka ya Mawasiliano Tanzania (TCRA) zimepewa siku 30 kutoa suluhisho la wizi wa mtandao kwa wateja wake.
Agizo hilo limetolewa Julai 23 na Waziri wa Ujenzi, Uchukuzi na Mawasiliano, Mhe. Mhandisi Isaack Kamwelwe wakati alipotembelea ofisi za TCRA ikiwa ni mara ya kwanza tangu alipohamishiwa wizara hiyo Julai mosi katika mabadiliko ya Baraza la Mawaziri yaliyofanywa na Rais John Magufuli.
Katika ziara hiyo huko TCRA, waziri alishuhudia makabidhiano ya leseni ya masafa ya 700MHz kwa kampuni ya Vodacom na kuwataka kushirikiana na TCRA kutafakari suala la wizi wa fedha kwenye laini za simu.
Mhe. Kamwelwe alisema kabla hawajaweka sheria itakayowalazimu kurudisha fedha za mteja itakayoibwa, lazima wakae kuangalia watu hao kama ni wafanyakazi waliofukuzwa.
Takwimu za matukio ya wizi wa mtandao zilizotolewa na Jeshi la Polisi nchini, zinathibitisha kuwa kuanzia Oktoba 2016 hadi Machi 2017 mambo yalikuwa kama ifuatavyo:-
Mkoa wa Dar Es Salaam ulikuwa na matukio 1,423 ya wizi wa fedha kwa njia ya mtandao wa simu huku ukifuatiwa kwa mbali na mkoa wa Mwanza ambao ulikuwa na matukio 659.
Kampuni zilizohusika na miamala hiyo ni Vodacom (M-Pesa), Tigo (Tigo Pesa), Airtel (Airtel Money), Zantel (Easy Pesa) na Halotel (Halopesa).
Takwimu zilizotolewa mwanzoni mwa mwaka jana na TCRA zilionyesha kwamba kampuni za simu za mikononi zilifanikiwa kufanikisha miamala ya shilingi trilioni 13.07 kwa muda wa miezi miwili.
Daima tusitegemee kwa asilimia zote mitandao ya simu kutoa msaada pale wizi wa mtandaoni unapotokea bali inatupasa kuwa mstari wa mbele kujiridhisha kikamilifu kabla ya kufanya muamala wa pesa.
Timu ya uandishi wa Kona ya Teknolojia ingefurahi kupata sapoti yako ili iendelee kukuletea habari na maujanja mbalimbali.
Wezesha bando kwa kutuma kiasi chochote kupitia Selcom, kwenye simu yako bofya *150*50*1# kwenye namba ya malipo weka 60751369 jina litakuja TEKNOKONA.
